Onques chevalier ne fist Deus
                 si preu d’armes conme il estoit.
                 Ce n’estoit pas cil ² qui vestoit
                 sa robe d’esté en yver; ³
  5            plus ⁴ donnoit il et gris et ver
                 c’uns autres de diz tanz d’avoir; ⁵
                 et tot jorz voloit il avoir
                 set conpaignons, ⁶ ou cinq au mains.
                 Ne ja riens ne tenist as mains,
10            s’en le vosist, ⁷ qu’en ne l’eüst. ⁸
                 Deduiz ⁹ d’oisiaus, quant li leüst, ¹⁰
                 ama, que je ne despris mie; ¹¹
                 il sot d’eschés et d’escremie
                 et d’autres geus plus que Tristans.
15            Molt bon mai ot un bien lonc tans ¹²
                 et molt se fist amer as genz.
                 Il ert ¹³ de cors et biaux ¹⁴ et genz
                 et frans et legiers et isneaus, ¹⁵
                 et si estoit plus preuz que beaus,
20            et tot ce doit chevaliers estre.

                 Amors, ¹⁶ qui est et dame et mestre,
                 en ce bon point li corut seure,
                 quë ele en velt estre au deseure,
                 et si ¹⁷ veut avoir le treü
25            du grant deduit qu’il ot eü
                 de mainte dame en son aage.
                 N’onques servise në honmage
                 ne li fist, entreues qu’il li lut. ¹⁸
                 Por ce qu’il ne se reconnut
30            n’a son honme n’a son bailleu, ¹⁹
                 si li fist en tens et en lieu
                 sentir son pooir et sa force:
                 c’onques Tristans, ²⁰ qui fu a force
                 tonduz conme fox por Yseut,
35            n’ot le tierz d’ahan quë il eut
                 de si qu’il en ot ²¹ sa pais faite.
                 Ele li a saiete traite
                 par mi le cors dusqu’au panon:
                 la ²² grant biauté et le doz non
40            d’une dame li mist el cuer.
                 Or li estuet ²³ ageter puer
                 toutes les autres por cesti. ²⁴
                 De maintes s’en estoit parti
                 son cuer, ²⁵ que nule n’en amoit;
45            mes or set il sanz doute et voit
                 qu’il li covient tot mestre ensemble
                 por ceste servir, qui li semble
                 li rubis de toutes biautez.
                 Li sens, la debonneretez,
50            la grant biauté de son cler vis
                 li est, ce li est bien avis,
                 devant ses eulz et jor et nuit. ²⁶