Dedenz cel tref fu la pucele: ³
                 flur de lis e rose nuvele,
                 quant ele pert al tens d’esté,
                 trespassot ele de beauté.
  5            Ele jut ⁴ sur un lit mut ⁵ bel -
                 li drap valeient un chastel -
                 en sa chemise senglement.
                 Mut ot ⁶ le cors bien fait e gent;
                 un cher mantel de blanc hermine,
10            covert de purpre alexandrine,
                 ot pur le chaut sur li ⁷ geté;
                 tut ot descovert le costé,
                 le vis, le col e la peitrine; ⁸
                 plus ert blanche que flur d’espine.

15            Le chevaler ⁹ avant ala,
                 e la pucele l’apela.
                 Il s’est devant le lit asis.
                 “Lanval,” ¹⁰ fet ele, “beus amis,
                 pur vus vienc jeo ¹¹ fors de ma tere;
20            de luinz vus sui venue quere.
                 Se vus estes pruz e curteis,
                 emperere ne quens ¹² ne reis
                 n’ot unkes tant joie ne bien; ¹³
                 kar jeo vus aim sur tute rien.”
25            Il l’esgarda, si la vit bele;
                 Amurs le puint ¹⁴ de l’estencele,
                 que sun quor alume e esprent.
                 Il li respunt avenantment.
                 “Bele,” fet il, “se vus pleiseit
30            e cele joie më aveneit
                 que vus me vousissez ¹⁵ amer,
                 ne savrïez rien comander
                 que jeo ne face a mien ¹⁶ poeir,
                 turt a folie u a saveir. ¹⁷
35            Jeo ferai vos comandemenz,
                 pur vus guerpirai tutes genz.
                 Jamés ne queor de vus partir:
                 ceo est la rien ¹⁸ que plus desir.” ¹⁹
                 Quant la meschine oï ²⁰ parler
40            celui que tant la peot amer,
                 s’amur e sun cors li otreie.
                 Ore est Lanval en dreite veie!
                 Un dun li ad duné aprés:
                 ja cele rien ne vudra mes
45            quë il nen ait a sun talent; ²¹
                 doinst ²² e despende largement,
                 ele li troverat asez.
                 Mut est Lanval bien herbergez:
                 cum plus despendra richement,
50            e plus avrat or e argent.
                 “Ami,” fet ele, “or vus chasti,
                 si ²³ vus comant e si vus pri,
                 ne vus descovrez a nul humme!
                 De ceo vus dirai ja la summe:
55            A tuz jurs m’avrïez perdue,
                 se ceste amur esteit seüe;
                 jamés ne me purriez veeir
                 ne de mun cors seisine aveir.”
                 Il li respunt que bien tendra
60            ceo quë ele li comaundera.