“Sire, çou a dit li ² preudon,
                 vous avés bien dit dusqu’a son,
                 mais que çou est sans repentance. ³
                 S’or voliés ⁴ faire penitance, ⁵
  5            si m’ariés ⁶ auques repaié.
                 – Or m’avés, fait cil, ⁷ bien paiiet,
                 que peneant me volés ⁸ faire!
                 Mal dehait ki en a que faire
                 ne qui ja veut que je le soie! ⁹
10            Et, se je faire le voloie,
                 quel penitance ¹⁰ me douriés? ¹¹
                 – Certes, quele que vous vauriés.
                 – Dites le dont. – Volentiers, sire.
                 Pour tous vos pechiés desconfire,
15            vous junerés ¹² un poi de tans,
                 les venredis dusqu’a set ans.
                 – Set ans! fait il, non ferai trois!
                 Non voir les venredis d’un mois!
                 Taisiés vous ent, riens n’en feroie,
20            c’est çou que faire ne poroie.
                 – Si alés descaus ¹³ un seul an.
                 – Non ferai, par saint Abrehan! ¹⁴
                 – Alés en langes, sans chemise. ¹⁵
                 – Ma chars seroit tantost remise
25            et estranlee de vermine.
                 – Si prendés une desepline
                 cascun matin d’une vergele. ¹⁶
                 – Chi a, fait il, pesme novele.
                 Je ne poroie ce souffrir
30            ne ma car rompre ne ferir.
                 – Si alés, fait il, outre mer. ¹⁷
                 – Cist mot, fait il, sont trop amer.
                 Taisiés vous ent, cë est wiseuse,
                 car li mers est trop perilleuse.
35            – Alés a Rome u a saint Jame. ¹⁸
                 – Je n’irai point, fait il, par m’ame.
                 – S’alés cascun jour au mostier,
                 si escoutés le Dieu mestier.
                 Si soiiés tant a genillons
40            c’aiiés dites deus orisons,
                 le patrenostre ¹⁹ et le salu, ²⁰
                 por ce que Diex vous doinst ²¹ salu.
                 – Trop i aroit, fait il, grant luite;
                 tous cis afaires riens n’afruite,
45            car certes je n’en ferai rien. ²²
                 – Comment? si ne ferés nul bien?
                 Si ferés, se Dieu plaist, et vous,
                 anchois que vous partés de nous. ²³
                 Or me faites seulement tant,
50            pour l’amour Dieu le tout poissant,
                 que vous portés men barisel
                 chi de desous a cest ruissel.
                 En le fontaine le puchiés,
                 si ne serés mie blechiés; ²⁴
55            et se vous plain le ²⁵ m’aportés,
                 cuites soiiés et deportés
                 de pechiés et de penitance,
                 dont vous ja mais n’arés doutance,
                 ains prenc tous vos pechiés sor moi. ²⁶
60            Or avés penitance a moi.”
                 Li sires ²⁷ l’oï, ²⁸ de desdaing rist,
                 aprés parla et si li dist:
                 “Ci n’a, fait il, mie grant paine
                 se je vois ²⁹ a cele fontaine:
65            ceste penitance ert ³⁰ tost faite!” ³¹