Il avint ja a Monpellier ¹
                 c’un vilain estoit costumier
                 de fiens chargier et amasser
                 a deus asnes terre fumer. ²
  5            Un jor ot ³ ses asnes chargiez;
                 maintenant ne s’est atargiez:
                 el ⁴ borc entra, ses asnes maine,
                 devant les chaçoit a grant paine;
                 souvent li estuet dire: “Hez!”
10            Tant a fait quë il est entrez ⁵
                 dedenz la rue as espiciers. ⁶
                 Li vallet batent les mortiers;
                 et quant il les espices sent,
                 qui li donast cent mars d’argent, ⁷
15            ne marchast il avant un pas,
                 ainz chiet pasmez isnelepas
                 autresi con së il fust ⁸ morz. ⁹
                 Iluec fu granz li desconforz
                 des genz qui dïent: “Dieu merci! ¹⁰
20            Vez de cest home qu’est morz ci!”
                 et ne sevent dire por quoi;
                 et li asne esturent ¹¹ tuit quoi
                 enmi la rue volentiers,
                 quar l’asne n’est pas costumiers
25            d’aler, se l’en nes semonoit.

                 Un preudome ¹² qu’iluec estoit,
                 qui en la rue avoit esté,
                 cele part vient, s’a demandé
                 as genz quë entor lui veoit: ¹³
30            “Seignor,” ¹⁴ fait il, “se nul voloit
                 a faire garir cest preudom,
                 gel gariroie ¹⁵ por du son.” ¹⁶
                 Maintenant li dit un borgois:
                 “Garissiez le tot demenois!
35            Vint sous avrez de mes deniers.”
                 Et cil respont: “Molt volantiers!”
                 Donc prant la forche qu’il portoit,
                 a quoi il ses asnes chaçoit, ¹⁷
                 du fien a pris une palee,
40            si li au nes a aportee.
                 Quant cil sent du fiens la flairor
                 et perdi des herbes l’odor,
                 les elz oevre, s’est sus sailliz,
                 et dist quë il est toz gariz.
45            Molt en est liez et joie en a, ¹⁸
                 et dit par iluec ne vendra
                 ja mais, së aillors puet passer. ¹⁹
                 Et por ce vos vueil ²⁰ ge monstrer ²¹
                 que cil fait e sens e mesure
50            qui d’orgueil se desennature:
                 ne se doit nus desnaturer. ²²
                 Explicit du vilain asnier.